Yanga imetinga fainali ya kombe la Muungano baada ya kuichapa Azam Fc mabao 2-1 katika mchezo wa nusu fainali uliopigwa uwanja wa New Amaan Complex visiwani Zanzbar.
Mabingwa hao watetezi wa michuano hiyo walianza kwa kasi na wakifunga mabao yote mawili kwenye kipindi cha kwanza kutipia kwa Prince Dube na Maxi Nzengeli.
Dube alifunga bao la kwanza akimalizia pasi ya Allan Okello kabla ya Maxi kuongeza bao la pili kupitia pasi ya Dube.
Pengine mambo yangekuwa mabaya zaidi kwa Azam Fc kwani Yanga ilitengeneza nafasi nyingi kwenye kipindi cha kwanza lakini wakatumia nafasi mbili tu.
Kipindi cha pili Azam Fc ilirejea ikiwa imara zaidi huku Yanga ikicheza kwa tahadhari kulinda uongozi wao.
Alikuwa ni Feisal Salum aliyefunga bao la kufutia machozi kwa upande wa Azam Fc.
Ni ushindi ambao umeitanguliza Yanga fainali sasa wakisubiri mshindi wa mchezo kati ya Simba dhidi ya Mlandege Fc nusu fainali ya pili utakaopigwa kesho Jumapili.
