Kikosi cha Yanga leo majira ya saa 12 muda wa mchezo kimefika uwanja wa Meja Jenerali Isamuhyo kwa ajili ya kukamilisha maandalizi ya mwisho kuelekea mchezo dhidi ya Simba hapo kesho.
Ni katika kukamilisha matakwa ya kanuni ambapo timu mgeni anapata nafasi ya kukamilisha maandalizi yake kwenye uwanja wa mechi.
Hata hivyo hali ya uwanja huo, haikuridhisha kutokana na mvua zinazoendelea kunyesha jijini Dar es salaam.
Ukweli ni kwamba kama mchezo huo ungekuwa unachezwa leo, ni wazi isingewezekana.
Hata hivyo jambo hilo wameachiwa TFF na Bodi ya ligi kwani ndio wenye mamlaka na maamuzi kwa kuzingatia hali halisi.
Lakini pia kulitokea sintofahamu baada ya Yanga kumaliza mazoezi, klabu ya Simba ilifika kwenye uwanja huo.
Kanuni zinaelekeza timu mgeni ndio inayohitimisha maandalizi mwisho lakini Simba wamefika na kutaka kuingia uwanjani baada ya Yanga kumaliza maandalizi.
Hali hiyo ilipelekea mvutano huku Yanga nao wakigoma kutoka uwanjani.
