Ligi Kuu ya NBC inaendelea leo mzunguuko wa 21 ambapo mabingwa watetezi Yanga watakuwa uwanja wa kMC Complex kuwakabili wenyeji wao KMC katika mchezo unaozikutanisha timu zenye malengo tofauti.
Wakati Yanga ikiwania alama tatu muhimu ili kuendelea kujichimbia kileleni mwa msimamo wa ligi, KMC wanaburuza mkia na pengine inaweza kuwa timu ya kwanza kushuka daraja msimu huu.
Wakusanya ushuru hao wa Kinondoni wamekusanya alama 9 kutoka mechi 20, kimahesabu wanahitaji kushinda kila mchezo ili kuwa salama.
Bahati mbaya kwao ni kuwa wanakutana na Yanga ambayo macho imeelekeza kwenye ubingwa, ikihitaji kuchukua alama tatu kwenye kila mchezo ili kuhakikisha wanakamilisha malengo yao.
Baada ya sare ya mabao 2-2 dhidi ya Simba katika mchezo uliopita, nyota wa Yanga walipewa mapumziko ya siku moja ambapo jana walikamilisha maandalizi yao kuelekea mchezo huo.
Meneja wa Habari na Mawasiliano wa Yanga Ali Kamwe amewataka mashabiki wajitokeze kwa wingi waipe sapoti timu yao katika mchezo ambao alama tatu ni muhimu sana kwao.
Mtanange huo unatarajiwa kupigwa saa 10 jioni.
