Baada ya Kocha Pedro Goncalves kufutwa kazi, benchi la ufundi la Yanga sasa litakuwa chini ya makocha watatu ambao watashirikiana kuhakikisha wanatetea mataji mawili yaliyosalia yaani ligi kuu na kombe la CRDB.
Meneja wa Habari na Mawasiliano wa Yanga Ali Kamwe ametoa mpangilio wa majukumu kwa benchi la ufundi hasa nafasi ya Kocha Mkuu na Kocha Msaidizi.
Kama ilivyoeleza taarifa ya Yanga jana, Abdilhamid Moalin alitangazwa kama Kaimu Kocha Mkuu, Kamwe amebainisha kuwa Kocha Patrick Mabedi nae atashirikiana na Moalin wote wakiwa ni Makocha Wakuu.
Aidha nafasi ya Kocha Msaidizi itaendelea kuhudumiwa na Matthew Silva ambaye alihudumu kwenye nafasi hiyo hata wakati wa Goncalves.
Baada ya ushindi dhidi ya KMC jana, kikosi cha Yanga kimerejea mazoezini kujiandaa na mchezo dhidi ya Coastal Union utakaopigwa Jumamosi, May 09 uwanja wa KMC Complex.
