Siku kama ya leo inapaswa kuondoka haraka kwenye vichwa vya wachezaji ili kuhakikisha wanarejea wakiwa imara kwenye mchezo unaofuata.
Nahodha Bakari Nondo Mwamnyeto ni miongoni mwa wachezaji wanaopaswa kusahau mchezo huu haraka.
Unaweza kusema mabao mawili ya kwanza waliyofunga Dodoma yalichangiwa na kukosekana kwa umakini kati ya nahodha na walinda lango wake.
Bao la kwanza Mwamyeto alijifunga katika jitihada za kuokoa mpira ambao alikuwa na nafasi ya kufanya maamuzi bora zaidi.
Bao la pili hakuwa na mawasiliano mazuri kati yake na golikipa Masalanga, alimpoteza golikipa baada ya kukwepa mpira ambao alikuwa na uwezo wa kuondoa kwa kichwa.
Dodoma Jiji hawakuwa na mashambulizi mengi langoni kwa Yanga lakini unaweza kusema walizawadiwa mabao mawili ambayo waliwarahisishia kazi.
Eneo la safu ya ushambuliaji pia hawawezi kukwepa lawama kwani nafasi nyingi zilipotea. Yanga ilikuwa na uwezo wa kumaliza mechi mapema kama nafasi zingetumika kwa usahihi.
Prince Dube hii ilikuwa mechi kuchukua usukani kwenye mbio za ufungaji bora lakini hakuwa katili mbele ya lango.
Kwenye mpira wa miguu kama hutumii nafasi unampa ujasiri mpinzani wako na kumuweka mchezoni. Ndicho kilichotokea leo Dodoma Jiji wakiibuka na ushindi wa mabao 3-2 baada ya 'kukoswa na mishale mingi'.
Nguvu sasa zielekezwe kwenye mchezo wa robo fainali kombe la CRDB dhidi ya JKT Tanzania ambao utapigwa Jumamosi, May 16 uwanja wa Isamuhyo.
