Ni saa chache kutoka sasa Yanga itashuka uwanja wa Sheikh Amri Abeid kuikabili Fountain Gate katika mchezo wa ligi kuu ya NBC.
Yanga itaingia kwenye mchezo huo ikiwa na dhamira moja tu, kusaka ushindi ili iweze kurejea kwenye nafasi yake juu ya msimamo. Wananchi watashuka dimbani wakiwa na silaha zao zote katika mchezo huo.
Kiungo kiraka Mudathir Yahya ni miongoni mwa wachezaji wanaobeba matumaini ya Wananchi kutokana na mwenendo wake mzuri wa mechi za karibuni.
Mudathir anashika nafasi ya nne katika orodha ya vinara wa mabao ligi kuu ya NBC msimu huu akiwa na mabao 9 kama ilivyo kwa Prince Dube.
Feisal Salum 'Fei Toto' anaongoza mbio hizo akiwa na mabao 14 huku Mossi Ndumumwe wa Singida BS akiwa nafasi ya pili na mabao 12.
Star Boy Allan Okello anashika nafasi ya tatu akiwa ameweka kambani mabao 11.
Pengine leo Okello anaweza kuendeleza kasi yake ya kuzifumania nyavu baada ya kutofunga kwenye mchezo uliopita.
Baada ya kuonyesha kiwango kizuri dakika chache alizocheza kwenye mchezo uliopita dhidi ya Mashujaa Fc, mshambuliaji Laurindo Aurelio 'Depu' leo huenda akapata nafasi ya kuanza kuwakabili Fountain Gate.
Depu na Dube leo bila ya kujali nani anaanza, watakuwa na kazi ya kuhakikisha nyavu za Fountain Gate hazitoki salama na kuwahakikisha Wananchi alama tatu muhimu.
Endapo Yanga itashinda mchezo wa leo basi itakuwa imepunguza presha kwani itarejea kileleni huku sasa ikisalia na mechi nyingine tatu za kuhakikisha ubingwa wa tano mfululizo.
