Mkufunzi wa Yanga Abdihamid Moalin amesema wamejiandaa kukamilifu kukabiliana na Azam Fc katika mchezo wa ligi kuu utakaopigwa kesho Jumatano katika uwanja wa New Amaan Complex.
Akizungumza na wanahabari kuelekea mchezo huo, Moalin amesema wanatambua hautakuwa mchezo rahisi lakini wamejiandaa vyema kuhakikisha wanaibuka na ushindi.
"Tunashukuru tulikamilisha vyema mchezo uliopita, hatukuwa na majeruhi hivyo tunajiandaa kikamilifu kuelekea mchezo unaofuata dhidi ya Azam Fc."
"Tunatambua utakuwa mchezo mgumu kwani tunakwenda kucheza dhidi ya timu bora yenye wachezaji na kocha bora."
"Kila mchezo kwetu ni fainali kwa sababu malengo yetu ni kutetea taji la ligi kuu, licha ya ugumu wa ratiba, ni jukumu letu kupambana na kuhakikisha tunapata matokeo mazuri kwenye kila mechi."
"Tumecheza na Azam Fc siku chache zilizopita, hilo linatupa mwanga wa maandalizi kuelekea mchezo huu. Tutaendeleza mazuri tuliyofanya katika mchezo uliopita na pia kusahihisha makosa yaliyojitokeza kwenye mchezo uliopita, "alisema Moalin.
Yanga inahitaji kushinda mchezo dhidi ya Azam Fc ili kujiweka katika nafasi nzuri ya kutetea taji la ligi kuu kwa msimu wa tano mfululizo.
