Yanga imetakata uwanja wa KMC Complex ikiibuka na ushindi wa mabao 3-0 dhidi ya TRA United katika mchezo wa mzunguuko wa 29.
Yanga iliingia kwenye mchezo huo ikiwa na ari ya kuhitaji matokeo ya ushindi na kazi ilifanywa vyema na Allan Okello 'Star Boy' aliyefunga hat-trik ya nne msimu huu.
Okello alifunga bao la uongozi la Yanga dakika y 27 akimalizia krosi ya Prince Dube na kuipeleka Yanga mapumziko ikiwa mbele kwa bao 1-0.
Kipindi cha pili Yanga iliendeleza msako kwenye lango la TRA United wakifanikiwa kupata mkwaju wa penati kwenye dakika ya 51 baada ya mlinzi wa TRA United kuunawa mpira ndani ya eneo la hatari.
Okello alikamilisha hat-trik yake dakika ya 57 baada ya Yanga kufanya shambulizi kali kutoka upande wa kushoto Okello akikutana na mpira unaozagaa eneo la hatari na kuuweka kambani.
Ulikuwa mchezo wa upande mmoja kwa muda mwingi na pengine Yanga ingefunga mabao zaidi kama umakini ungekuwa mkubwa eneo la umaliziaji.
Ushindi huo unaiweka Yanga katika nafasi nzuri ya kutwaa ubingwa kwenye mchezo wa mwisho dhidi ya JKT Tanzania pengine wakihitaji alama moja tu kumaliza kazi.
