Baada ya mapumziko ya takribani wiki tatu kufuatia kumalizika kwa msimu uliopita, mabingwa wa Tanzania Bara, Yanga, wanatarajiwa kuanza rasmi maandalizi ya msimu wa 2026/27 siku ya Jumatatu, Julai 20, 2026.
Maandalizi hayo yataongozwa na Kocha Mkuu mpya, Manqoba Mngqithi, ambaye anatarajiwa kuwasili nchini pamoja na benchi lake la ufundi tayari kuanza kazi ya kukiandaa kikosi kwa changamoto za msimu mpya.
Kwa mujibu wa taarifa, Yanga itafanya kambi ya maandalizi katika viwanja vya Avic Town, ambapo kikosi kitafanya mazoezi ya takribani wiki tatu yakilenga kuimarisha utimamu wa mwili, mbinu na ushindani kabla ya kuanza rasmi kwa mashindano.
Mtihani wa kwanza kwa Mngqithi na kikosi chake unatarajiwa kuwa mchezo wa Ngao ya Jamii dhidi ya watani wa jadi Simba, utakaopigwa Agosti 12. Mchezo huo utatoa picha ya awali ya maendeleo ya timu kuelekea msimu mpya wa Ligi Kuu Tanzania Bara na mashindano mengine.
Wakati huohuo, taarifa zinaeleza kuwa baadhi ya wataalamu waliokuwa sehemu ya benchi la ufundi la msimu uliopita wanatarajiwa kuendelea na majukumu yao chini ya kocha huyo mpya.
Miongoni mwa wanaotarajiwa kubaki ni Kocha Msaidizi Abdilhamid Moalin pamoja na kocha wa viungo Tshephang "Chyna" Mokaila, ambao wanatajwa kuwa sehemu ya benchi jipya la ufundi litakaloongozwa na Mngqithi.
