Wananchi wako busy sana kwenye dirisha hili la usajili. Yanga inafanya maboresho makubwa ya kikosi kwa lengo ya kujiimarisha baada ya misimu mitano mfululizo ya mafanikio.
Eneo la kiungo mkabaji ni miongoni mwa maeneo yaliyohitaji maboresho ambapo inaelezwa mchakato wa kuinasa saini ya nyota raia wa Nigeria Morrice Chukwu uko kwenye hatua za mwisho.
Chukwu ni mchezaji huru baada ya kumaliza mkataba kunako klabu ya Singida BS. Matajiri hao kutoka mkoani Singida walikuwa kwenye mazungumzo nae ili kuhuisha mkataba wake lakini inaelezwa mazungumzo hayo yamevunjika baada ya Yanga kuingilia kati.
Unaweza kusema ni suala la muda sasa Chukwu atatua kwa mabingwa hao wa soka Tanzania Bara akipishana na Mohamed Damaro ambaye amerejea Singida BS baada ya mkataba wake wa mkopo wa miezi 6 kumalizika.
Chukwu alikuwa mmoja wa wachezaji tegemea kwenye kikosi cha Singida BS katika misimu miwili iliyopita akimudu vyema kucheza kama kiungo mkabaji au beki wa kati.
Nyota hiyo alijiunga na Singida BS kwa mara ya kwanza akitokea klabu ya Rivers United ya Nigeria ambayo msimu wa 2022/23 ilichuana na Yanga robo fainali ya kombe la Shirikisho (CAFCC) ikifungwa mabao 2-0 huko Nigeria. Chukwu alikuwa sehemu ya kikosi hicho.
