Kocha Mkuu wa Yanga SC, Manqoba Mngqithi, ameweka wazi kuwa kikosi chake kiko tayari kwa mchezo wa Ngao ya Jamii dhidi ya Simba SC utakaopigwa kesho, Jumatano, Agosti 12, katika Uwanja wa New Amaan Complex, Zanzibar.
Akizungumza na wanahabari kuelekea mchezo huo mapema leo, Manqoba amesema anaamini ubora wa kikosi chake na kwamba wachezaji wake wako tayari kupambana kuhakikisha wanaanza msimu mpya kwa ushindi.
Kocha huyo amesema lengo lao ni kufanya vizuri katika mchezo huo na kuwapa furaha mashabiki wa Yanga ambao wanatarajia kuona timu yao ikifanya vizuri dhidi ya wapinzani wao wa jadi.
“Tunaamini katika ubora wa kikosi chetu. Kesho tunakwenda kupambana ili kuwapa furaha mashabiki wetu,” amesema Manqoba.
Amini Ubora wa Kikosi
Manqoba amekiri kuwa Yanga haikupata muda wa kutosha wa kufanya maandalizi ya pre-season, lakini amesema hilo halijawanyang’anyi imani kwamba wana kikosi chenye uwezo wa kushindana na kushinda dhidi ya Simba.
Kocha huyo amesema amezingatia ubora wa wachezaji alionao na anaamini wana uwezo wa kuonyesha kiwango kizuri licha ya changamoto ya muda mfupi wa maandalizi.
“Licha ya kutokuwa na pre-season ya kutosha, ninaamini timu yangu ina ubora wa kutosha wa kushinda mchezo wa kesho dhidi ya Simba,” amesema.
Awaahidi Mashabiki Soka Safi
Kocha Manqoba pia amewataka mashabiki wa Yanga kuwa na matarajio makubwa kutoka kwa kikosi chake, akisisitiza kuwa wachezaji alionao wana uwezo wa kucheza soka safi na la kuvutia.
Amesema mashabiki wanapaswa kutarajia kuona timu ikicheza kwa kiwango kizuri na kupambana kwa nguvu zote katika mchezo huo wa Ngao ya Jamii.
“Kwa wachezaji nilionao kikosini, mashabiki watarajie soka safi na la kuvutia. Mashabiki watafurahi,” amesema Manqoba.
Hana Presha ya Dabi
Kuhusu presha inayoweza kuambatana na mchezo wa dabi kati ya Yanga na Simba, Manqoba amesema hana hofu kutokana na uzoefu wake mkubwa katika kazi ya ukocha.
Kocha huyo amesema amekuwa katika mchezo wa soka kwa muda mrefu na ameshakutana na mechi nyingi zenye presha kubwa, hivyo ana uwezo wa kuhimili mazingira ya aina hiyo.
“Nina miaka 25 katika ukocha, sijawahi kusumbuliwa na presha ya mechi za aina hii. Nina uzoefu wa kuhimili presha,” amesema.
Mchezo huo wa dab utakuwa wa kwanza kwa Manqoba na benchi lake la ufundi ukiwa pia ni mchezo wake wa kwanza wa kimashindano tangu alipotua kwa Wananchi mwezi uliopita.
