Mlinzi wa Yanga Mohamed Hussein 'Zimbwe Jr' amesema maandalizi kuelekea mchezo wa Ngao ya Jamii dhidi ya Simba yamekamilika huku wachezaji wakipania kuanza vyema msimu kwa kutwaa Ngao ya Jamii.
Zimbwe Jr ambaye huu ni msimu wake wa pili tangu ajiunge na mabingwa hao wa soka Tanzania Bara, amesema watakwenda kupambana kwa ari moja kwenye mchezo huo ili kuhakikisha wanashinda.
"Kwa niaba ya wachezaji wenzangu moja ya malengo yetu ni kuanza msimu vizuri kwa kushinda mechi hii muhimu ya kesho, naweza kusema tumejiandaa vizuri na sote tunafahamu umuhimu wa mchezo huu na tunatambua jukumu tulilonalo la kulinda na kulitetea taji letu."
"Tutaingia uwanjani tukiwa na umoja, ari na kujiamini tukiamini kwamba tutafanya kila linalowezekana kuhakikisha tunapata matokeo mazuri"
"Tunawaomba mashabiki wetu wajitokeze kwa wingi uwanjani kesho, watusapoti na kuwa nyuma yetu katika kila dakika ya mchezo. Tunajua uwezo mkubwa wa kushangilia wa mashabiki wetu na tunahitaji sapoti yao ili kutupa nguvu zaidi ya kupambana hadi dakika ya mwisho," alisema Zimbwe Jr
