Kocha Mkuu wa Yanga Manqoba Mngqithi amesema mchezo wa ligi kuu dhidi ya JKT Tanzania utakuwa mgumu pengine kuliko mechi zilizopita ambazo wamecheza mpaka sasa msimu huu.
Akizungumza katika mkutano na wanahabari kuelekea mchezo huo utakaopigwa kesho Jumatatu kwenye uwanja wa KMC Complex, Manqoba amesema matokeo waliyopata JKT Tanzania kwenye mechi za mbili zilizopita hayaakisi ubora wao huku akimpongeza kocha Ahmed Ali kwa kazi nzuri aliyofanya.
"Kwa mtizamo wangu naona JKT Tanzania ni timu nzuri sana nafikiri matokeo waliyopata katika mechi zilizopita hayaakisi ubora wa timu yao. Kocha Ahmed Ali amefanya kazi nzuri."
"Wana wachezaji wengi wabunifu, ni timu inayoonekana kukua haraka, tunapaswa kwenda kuwakabili kwa umakini mkubwa," alisema Manqoba.
Akizungumzia maandalizi ya kikosi chake, Manqoba alisema licha ya kutopata muda wa kutosha kujiandaa, vijana wake wako tayari kuendeleza mwanzo mzuri wa msimu huu.
Manqoba amewataka mashabiki wa Yanga kujitokeza kwa wingi ili kuendelea kuwapa hamasa wachezaji wake ambao ameahidi watapambana ili kuwapa furaha.
Kocha huyo raia wa Afrika Kusini amesema bado timu yake haijafika kwenye ubora anaohitaji kutokana na ufinyu wa muda wa maandalizi lakini anaamini kwa sapoti ya mashabiki, wachezaji watafanya zaidi na kuhakikisha wanashinda.
Manqoba amesema Yanga itaendelea kukosa huduma ya wachezaji wawili Dickson Job na Clement Mzize ambao ni majeruhi wa muda mrefu lakini wachezaji wengine wote wako tayari kwa mchezo huo.
