Mabingwa watetezi wa Ligi Kuu ya NBC, Yanga SC, wameendeleza wimbi lao la ushindi kwa kishindo baada ya kuichapa JKT Tanzania mabao 4-0 katika mchezo uliopigwa leo Jumatatu kwenye Uwanja wa KMC Complex uliopo Mwenge, Dar es Salaam.
Mchezo huo uliotawaliwa na Yanga kwa muda mwingi, uliwashuhudia Vijana wa Jangwani wakitandaza soka safi kuanzia dakika ya kwanza na kuwapeleka mchakamchaka wapinzani wao ambao walionekana kuzidiwa mbinu katika kila idara.
Yanga ilifungua karamu ya mabao katika dakika ya 28 kupitia kwa kiungo mshambuliaji wao mahiri Albert Kangwanda, aliyemalizia mpira uliogonga mwamba ambao ulipigwa na Chadrack Boka.
JKT Tanzania walijaribu kujipanga upya lakini safu yao ya ulinzi ilijikuta ikifanya makosa yaliyomruhusu beki Ibrahim Bacca kupachika bao la pili kwa kichwa kikali mnamo dakika ya 34 baada ya krosi ya Zakouani.
Kabla hata JKT Tanzania hawajakaa sawa, beki wa pembeni Shadrack Boka aliongeza goli la tatu katika dakika ya 38 akimalizia mpira wa adhamu uliopigwa na Kangwanda ambalelicha ya kufunga bao kwenye mchezo huo, alitoa asisti mbili na kuondoka na tuzo ya nyota wa mchezo.
Kipindi cha pili kilianza kwa kasi ya wastani, huku JKT Tanzania wakijitahidi kuzuia mafuriko yasiendelee. Hata hivyo, katika dakika ya 63, mshambuliaji Peter Shalulile alihitimisha karamu hiyo ya mabao kwa kufunga goli la nne baada ya kupokea pasi ya mwisho kutoka kwa Kangwanda.
Ushindi huu unairejesha Yanga kileleni mwa msimamo wa Ligi Kuu ya NBC, ikionyesha dhamira ya wazi ya kutaka kulitetea taji hilo msimu huu. Kwa upande wa JKT Tanzania, kipigo hiki kinawaacha katika wakati mgumu wakihitaji kujipanga upya katika mechi zao zinazofuata.
