Juzi mashabiki wa Yanga walimshuhudia kwa dakika 74 kiungo Fredy Ngoma akianza rasmi kutumika kwenye mechi za mashindano.
Ngoma raia wa Congo alijiunga na Yanga usajili wa dirisha lililopita akitokea Bizertin na alikuwa hajatumika kwenye mechi yoyote tangu msimu umeanza huku ikielezwa alikuwa bado hajawa fiti kuingia kwenye kikosi cha kocha Manqoba Mngqithi ambaye amekuwa akitaka mchezaji aliye fiti asilimia 100.
Katika mchezo huo ambao Yanga ilishinda kwa mabao 2-0, kwenye Uwanja wa KMC Complex kiungo huyo alionyesha kiwango cha juu akiwapa imani mashabiki wa Yanga ambao tangu kuondoka kwa Khalid Aucho, wanaamini pengo lake halikuwahi kupata mtu sahihi.
Katika mchezo huo, Ngoma alipiga jumla ya pasi 34 huku 32 zikifika wakati mbili zilipotea, lakini jambo bora zaidi kwake ni kwamba pasi zake nyingi ni zile za kwenda mbele.
Katika nafasi hiyo ni wazi atashirikiana na kiraka Duke Abuya ambaye unaweza kusema amemvutia zaidi Manqoba. Mara kadhaa kocha huyo raia wa Afrika Kusini amemsifu Abuya huku akibainisha kuwa ni mtu muhimu sana katika safu yake ya kiungo.
