Meneja wa Habari na Mawasiliano wa Yanga Ali Kamwe amesema kikosi cha Yanga kimejipanga kikamilifu kuhakikisha wanaanza vyema kampeni ya ligi ya mabingwa msimu huu.
Yanga iliwasili Botswana jana tayari kwa mchezo wa hatua ya awali mkondo wa kwanza dhidi ya Gaborone United utakaopigwa siku ya Jumamosi.
Akizungumza muda mfupi baada ya kuwasili nchini humo, Kamwe aliwahakikishia Wanachama na Mashabiki wa Yanga kuwa timu yao iko imara na inakwenda kupambana ugenini kuhakikisha wanapata matokeo mazuri ambayo yatawaweka katika nafasi nzuri ya kufuzu raundi ya kwanza kwenye mchezo wa marudiano.
Kamwe amesema wanatambua ubora wa wapinzani wao na wanajua mchezo huo hautakuwa mwepesi.
"Timu imewasili salama hapa Gaborone, tumepata mapokezi mazuri, hapa kuna Watanzania wengi wanaishi. Lakini pia tuna sapoti kubwa ya mashabiki, wachezaji kama Peter Shalulile na Stephane Aziz Ki wanafahamika zaidi na mashabiki wa hapa"
"Sisi tumekuja kupambana ili tupate matokeo mazuri, tunatambua hakuna mchezo rahisi kwenye michuano ya ligi ya mabingwa ndio maana tumefanya usajili mkubwa ili kuhakikisha tunafanya vyema kwenye michuano hii," alisema Kamwe.
Baada ya kuwasili Botswana, vijana wa kocha Manqoba Mngqithi wameanza maandalizi kabambe kuelekea mchezo huo siku ya Jumamosi.
Mkakati wa Yanga ni kuanza na ushindi ugenini ili kujiwekea mazingira mazuri ya kutinga raundi ya kwanza kwenye mchezo wa marudiano.
