Kikosi cha Yanga leo kimerejea mazoezini wakijiandaa na mchezo wa Kimataifa wa kirafiki dhidi ya St George ya Ethiopia utakaopigwa kesho Ijumaa kwenye uwanja wa Uhuru.
Baada ya mchezo huo wachezaji walioitwa kwenye majukumu ya timu za Taifa wanatarajiwa kujiunga na mataifa yao kwa ajili ya mechi za kuwania kufuzu Afcon 2027 lakini kwa wale wengine watakaobaki, ni kazi kazi.
Kocha Mkuu wa Yanga Manqoba Mngqithi ameweka wazi mkakati wake wa kutumia kipindi hiki kuimarisha baadhi ya wachezaji ambao bado hawajafikia utimamu 'fitness' kwa asilimia 100.
Mara kadhaa Manqoba amefafanua sababu ya kutowatumia baadhi ya wachezaji au kuwatumia kwa dakika chache akieleza kutokuwa fit kwa asilimia 100.
“Katika kipindi cha mapumziko ya kalenda ya FIFA, tutakuwa na muda maalum wa kuwafanyia kazi wachezaji ambao bado hawajafikia kiwango kizuri cha utimamu wa mwili."
"Tutatumia kipindi hiki kuwapandisha hatua kwa hatua mpaka wafikie kiwango tunachokitaka,” alisema Mngqithi.
Wachezaji ambao Manqoba 'ana kazi nao' kwenye uwanja wa mazoezini ni pamoja na Dickson Job na Clement Mzize ambao wamekuwa nje kwa muda mrefu wakiwa majeruhi.
Lakini pia wamo Kibwana Shomari ambaye pia alikuwa majeruhi huku Stephane Aziz Ki naye akiingia kwenye kundi hilo baada ya kukosa sehemu kubwa ya maandalizi ya pre-season
Pia wamo wachezaji kama Fredy Ngoma na Farouk Komara ambao pia walichelewa kujiunga na wenzao kwenye pre-season.
