Yanga Princess imeendelea na maandalizi kuelekea mchezo wake wa kwanza wa ushindani msimu huu, ambapo itakutana na watani wao wa jadi Simba Queens katika nusu fainali ya Ngao ya Jamii ya Wanawake.
Mchezo huo unaotarajiwa kuchezwa Septemba 30, utakuwa sehemu ya ufunguzi wa msimu mpya wa soka la Wanawake nchini na umebeba hamasa kubwa kutokana na historia ya ushindani kati ya timu hizo mbili za Kariakoo.
Uongozi wa Yanga umefanya maboresho makubwa kwenye kikosi cha Yanga Princess katika maandalizi ya msimu mpya, ikiwa ni sehemu ya kuongeza ushindani wa timu hiyo msimu huu.
Chini ya kocha Edna Lema, kikosi hicho kinaendelea na maandalizi katika uwanja wa KMC Complex, kikilenga kufungua msimu kwa matokeo mazuri dhidi ya Simba Queens.
Kwa mujibu wa ratiba iliyotolewa na TFF, Septemba 30 kutakuwa na michezo miwili ya nusu fainali ya Ngao ya Jamii.
Mchezo wa kwanza utawakutanisha JKT Queens na Mashujaa FC saa 9:00 alasiri, kabla ya macho yote kuelekezwa kwenye pambano la Kariakoo kati ya Yanga Princess na Simba Queens, litakalochezwa saa 12:00 jioni.
