Chama cha Wachezaji wa Mpira wa Miguu Tanzania (SPATA) kimeanza kuangalia suala la beki wa Yanga, Israel Mwenda, ambaye ameendelea kukosekana kwenye kikosi cha mabingwa hao wa Ligi Kuu Bara huku kukiwa na sintofahamu kuhusu uhusiano wake na klabu hiyo.
Hatua hiyo inakuja baada ya Mwenda, kupitia upande wake, kuomba msaada wa SPATA katika jitihada za kutafuta suluhu ya tofauti zilizopo kati yake na Yanga, waajiri wake.
Mwenyekiti wa SPATA, Mussa Kisoki, amethibitisha kuwa chama hicho kinafahamu suala hilo, lakini akasema bado ni mapema kuweka wazi hatua wanazochukua kwa kuwa mchakato wa kulishughulikia unaendelea.
“SPATA ndiyo Chama cha Wachezaji wa Mpira wa Miguu Tanzania, hivyo kama kuna kitu chochote kinachowahusu ni lazima sisi tujitoe kwa sababu kanuni inaturuhusu. Kuhusu suala hilo naomba utupe muda na tutalitolea ufafanuzi,” alisema Kisoki, akizungumza na Mwanaspoti.
Taarifa hiyo inaongeza sura mpya katika sakata la Mwenda ambalo limekuwa likizungumziwa tangu mwisho wa msimu uliopita, huku beki huyo akishindwa kuonekana katika kikosi cha Yanga katika kipindi cha kuelekea msimu mpya wa 2026/27.
Yanga: Mwenda hakusimamishwa
Uongozi wa Yanga umekuwa ukikanusha taarifa kwamba ulimsimamisha Mwenda au kumwandikia barua ya kumtuhumu kwa kuihujumu timu.
Katika moja ya mahojiano yake, Meneja wa Habari na Mawasiliano wa Yanga, Ally Kamwe, alisema kuwa klabu haikuwahi kumfungia mchezaji huyo, bali Mwenda ndiye aliyeanza kukaa nje ya timu kabla ya kuwasilisha barua akiomba kujiweka pembeni.
Kwa mujibu wa maelezo ya Kamwe, baada ya kupokea barua hiyo klabu ilimjibu na kumtaka arudi kazini pamoja na kutoa maelezo kuhusu kutokuwepo kwake, lakini hakurejea kambini.
Kamwe alibainisha kuwa barua hiyo iliandikwa Julai 3, 2026, ambapo Mwenda alieleza kuwa aliamua kujiweka kando ili kupata muda wa kujitathmini kutokana na kiwango chake katika kipindi ambacho Yanga ilikuwa ikipambana kufikia malengo yake.
Sakata hilo limehusishwa kwa kiasi kikubwa na mchezo wa Ligi Kuu Bara kati ya Simba na Yanga uliochezwa Mei 3, 2026 kwenye Uwanja wa Meja Jenerali Isamuhyo.
Mchezo huo ulimalizika kwa sare ya mabao 2-2 baada ya Simba kupata mabao mawili ndani ya dakika za mwanzo, kabla ya Yanga kusawazisha.
Mwenda alikuwa miongoni mwa wachezaji wa Yanga walioanza mchezo huo, lakini alicheza kipindi cha kwanza pekee. Baada ya mchezo huo, alikabiliwa na mjadala mkubwa kutoka kwa baadhi ya mashabiki ambao waliona kuwa makosa yake yalihusika katika mabao ya Simba.
Hata hivyo, taarifa hizo hazijathibitisha kwamba Mwenda alifanya makosa hayo kwa makusudi au kwamba kulikuwa na upangaji wa matokeo.
