Shirikisho la Mpira wa Miguu Tanzania (TFF) limewaruhusu wachezaji wa Yanga SC, Simba SC na Singida Black Stars waliopo kwenye kambi ya Taifa Stars kurejea katika klabu zao kwa ajili ya maandalizi ya michezo yao, ikiwemo Dabi ya Kariakoo.
Hatua hiyo imekuja baada ya klabu hizo kuwasilisha maombi ya kuwarudisha wachezaji wao kutoka kwenye kambi ya Taifa Stars.
Akizungumza kuhusu suala hilo, Katibu Mkuu wa TFF, Evans Mgeusa, amekanusha taarifa inayodai wachezaji wa Yanga pekee ndio wameruhusiwa kwani si Yanga SC pekee iliyowasilisha ombi la kurejesha wachezaji wake, bali pia Simba SC na Singida Black Stars wameomba wachezaji wao kurejea kwenye klabu.
Mgeusa amesema maombi yote yamekubaliwa na TFF, huku Yanga SC ikiwa imewasilisha ombi hilo mapema zaidi.
“Yanga SC wao waliomba tangu Septemba 30, 2026, ila Simba SC na Singida Black Stars wao wameomba jana, Oktoba 1, 2026, na wote tumewaruhusu,” alisema Mgeusa.
Kwa mujibu wa Katibu Mkuu huyo, wachezaji wa Yanga SC wanatarajiwa kuondoka kambini kesho, huku Simba SC na Singida Black Stars zikiwa bado hazijakata tiketi za safari za kuwarejesha wachezaji wao nchini.
“Wachezaji wa Yanga SC wanaondoka kesho, hao ndio najua. Ila Simba SC na Singida BS bado timu zao hazijakata tiketi ili tujue ni lini wanaondoka kambini kurudi Tanzania,” aliongeza Mgeusa.
Timu ya Taifa iko nchini Morocco kucheza mechi za kirafiki baada ya kukamilika kwa mechi mbili za kuwania kufuzu Afcon 2027.
Oktoba 05 Stars itachuana na wenyeji wao Morocco
Nyota wa Yanga walio kwenye kikosi cha Stars ni Mohamed Hussein, Ibrahim Bacca, Mudathir Yahya na Seleman Mwalimu baada ya nahodha Bakari Nondo Mwamnyeto kushindwa kusafiri kutokana na changamoto za kifamilia
