Meneja wa Habari na Mawasiliano wa Yanga, Ali Kamwe, amesema klabu hiyo bado ina nafasi ya kutwaa ubingwa wa Ligi Kuu ya NBC licha ya kupoteza mchezo wa Kariakoo Derby dhidi ya Simba kwa mabao 2-1 mwishoni mwa wiki iliyopita.
Kamwe amesema bado kuna michezo 23 ya ligi iliyosalia, hivyo matokeo ya mchezo mmoja hayapaswi kuwakatisha tamaa mashabiki, wanachama na wapenzi wa timu hiyo katika safari ya kuwania ubingwa wa msimu huu.
Akizungumza na waandishi wa habari katika Makao Makuu ya Yanga, Jangwani, Kamwe amesema klabu hiyo inaendelea kusimamia lengo lake la kutwaa ubingwa wa ligi ya ndani na kwamba kilichotokea katika mchezo dhidi ya Simba kinapaswa kuwa sehemu ya kujifunza na kuimarisha maandalizi ya michezo inayofuata.
Amesema kupoteza mchezo wa watani wa jadi ni jambo lenye maumivu makubwa kwa mashabiki kutokana na ushindani na hisia zinazozunguka pambano hilo, lakini amewataka wanachama na wapenzi wa Yanga kuelekeza nguvu zao katika kuisukuma timu kurejea kwenye kiwango chake.
“Lengo la Young Africans Sports Club msimu huu ni kupigania na kutwaa ubingwa wa ligi ya ndani. Hatupaswi kuruhusu matokeo ya mchezo mmoja yatutoe katika mwelekeo wetu au kutufanya tusahau kile tulichokianza kukipigania tangu mwanzo wa msimu,” amesema Kamwe.
Ameongeza kuwa umoja, mshikamano, nidhamu na maandalizi mazuri ni mambo muhimu yatakayoisaidia timu hiyo kukabiliana na changamoto zilizopo na kuendelea kupambana katika michezo iliyosalia.
Kamwe amewataka mashabiki wa Yanga kuendelea kuiunga mkono timu yao badala ya kukata tamaa kutokana na matokeo ya Kariakoo Derby, akisisitiza kuwa huu ni wakati wa kuimarisha imani na mshikamano ndani ya klabu.
Aidha, amewataka wachezaji na benchi la ufundi kujifunza kutokana na makosa yaliyojitokeza katika mchezo huo ili kuzuia kujirudia kwa matokeo yasiyoridhisha katika mechi zijazo.
