Wakati mashabiki wa Yanga wakiendelea kushuhudia mabadiliko ya kiufundi ya timu yao chini ya kocha Manqoba Mngqithi, kuna aina fulani ya ufundi umeanza kuonekana kwenye eneo la kiungo ambalo anatumika Fred Duval Ngoma.
Raia huyo wa Jamhuri ya Congo Brazzavile, ameanza kuwateka mashabiki wa Yanga kutokana na staili yake ya uchezaji inayochanganya utulivu wa hali ya juu na matumizi makubwa ya akili ya mpira (football brain).
Tofauti na viungo wengi wakabaji wanaosifika kwa rafu na matumizi makubwa ya nguvu, Ngoma yeye ni mchezaji wa aina tofauti kabisa.
Yeye ni mfano halisi wa kiungo wa chini anayepanga mchezo (deep-lying playmaker). Anacheza bila haraka, anajua namna ya kulinda eneo lake mbele ya mabeki, na kila anapopokea mpira chini ya shinikizo la wapinzani, hutumia "first touch" yake tulivu kuanzisha mashambulizi mapya kwa kupiga pasi za uhakika.
Sifa kuu inayomtofautisha Ngoma uwanjani ni uwezo wake mkubwa wa kusoma mchezo mapema (anticipation). Badala ya kukimbia hovyo, anajua kusimama kwenye nafasi sahihi jambo linalomfanya arejeshe miliki ya mpira kwa timu yake (ball recovery) kwa urahisi.
Kocha Mkuu wa Yanga Manqob Mngqithi ameonekana kumtumia Ngoma katika mbinu zake kama kiungo mchezeshaji kutokea chini, njia za mipira inayokwenda mbele mara nyingi huanzia kwake.
Ni kutokana na uwezo wake mkubwa wa kupiga pasi ambazo wakati mwingine zinavuka hadi mistari miwili ya ulinzi.
Moja ya maeneo ambayo kocha Manqoba amebainisha kuimarika kwenye kikosi chake ni uwezo wa kuzifungua timu zinazojiilinda kutokea chini (low block).
Uwepo wa viungo kama Ngoma kwenye kikosi cha Yanga pengine ni moja ya sababu ya mafanikio hayo.
