Wakati mashabiki wa Yanga wakisubiri utambulisho wa kocha mkuu anayetua kuchukua nafasi ya Manqoba Mngqithi, kuna uwezekano mkubwa kwa Kocha Msaidizi Simon Dladla akaendelea kuwa sehemu ya benchi la ufundi akiwa kocha msaidizi.
Dladla alikabidhiwa majukumu ya kaimu kocha mkuu na amefanya vyema katika mechi mbili alizokaa kwenye benchi la ufundi.
Aliiongoza Yanga kushinda mabao 2-1 dhidi ya Mashujaa Fc na kisha kuwaongoza tena Wananchi kuibuka na ushindi wa mabao 4-0 dhidi ya Kagera Sugar.
Katika mechi hizo halikuwa suala la ushindi tu, pia yalionekana maboresho makubwa ya kimbinu, timu ikishambulia kwa kasi huku uwajibikaji wa wachezaji ukionekana.
Dladla ameonyesha uwezo wake na pengine hilo linatosha kumbakisha katika benchi la ufundi.
Kinachosubiriwa kwa hamu na mashabiki wa yanga ni kutangazwa jina la kocha mkuu ambaye huenda akaendelea na sehemu kubwa ya wataalam waliopo sasa kwenye benchi la ufundi.
Nafasi nyingine inayosubiri kujazwa ni ya kocha wa viungo baada ya Chyna Mokaila kupewa mkono wa kwaheri sambamba na Manqoba.
Kwa sasa uongozi wa Yanga umewapa wachezaji mapumziko ya siku chache kabla kurejea kuanza maandalizi ya mechi zitakazofuata baada ya mapumziko ya kalenda ya FIFA.
