Kocha Mkuu wa Yanga Fadlu Davids jana ameongoza rasmi mazoezi ya kwanza ya kikosi cha Wananchi kilichoweka kambi Zanzibar kwa ajili ya maandalizi ya mechi zinazofuata baada ya mapumziko ya kalenda ya FIFA.
Hata hivyo haikuchukua muda mrefu milio kusikika kutoka kwa watani zao upande wa pili baada ya klabu ya Simba kufungua madai FIFA dhidi ya Fadlu wakimtuhumu kuvunja mkataba na klabu hiyo kinyume cha taratibu msimu uliopita.
Fadlu aliachana na Simba mwanzoni mwa msimu uliopita na kujiunga na klabu ya Raja CA baada ya Morocco. Aliondoka Simba baada ya mchezo wa ligi ya mabingwa dhidi ya Gaborone United uliopigwa huko Botswana.
Hata hivyo hakukuwa na malalamiko yoyote kutoka kwa Simba dhidi ya Fadlu katika kipindi chote alichokuwa anaitumikia Raja CA lakini baada ya kutua Yanga mambo yamebadilika.
Kwa mujibu wa taarifa, kesi baina ya pande hizo imepangwa kusikilizwa Januari 2027 na Shirikisho la soka duniani (FIFA).
Kwa upande wa Fadlu amewaachia Wanasheria wake kushughulikia kesi hiyo huku yeye akijikita kwenye majukumu yake na Yanga.
Fadlu ameanza majukumu yake akiwa na ari kubwa akipania kuirejesha Yanga kwenye makali yake baada ya kuyumba mwanzoni mwa msimu.
