Yanayojiri Urusi : Uingereza majaribuni dhidi ya Colombia leo

Uingereza inasaka nafasi ya kutinga robo fainali ya michuano ya kombe la dunia huko Urusi leo itakapoikabili Colombia kwenye mchezo wa hatua ya 16 bora utakaopigwa saa tatu usiku.

Kikosi cha Uingereza kilichosheheni wachezaji vijana kinaonekana kuimarika zaidi kwenye michuano ya mwaka huu.

Timu hiyo inayonolewa na kocha Gareth Southgate inapewa nafasi kubwa ya kuibuka na ushindi kwenye mchezo huo ingawa michuano hiyo imekuwa na 'maajabu'.

Uingereza haijawahi kufungwa na Colombia. Timu hizo zimekutana mara tano, Uingereza imeshinda mara tatu ya kutoka sare mara mbili.

Mara ya mwisho kwa timu hizo kukutana kwenye michuano ya kombe la dunia ilikuwa mwaka 1998 ambapo Uingereza iliibuka na ushindi wa mabao 2-0.

Colombia ilianza michuano hiyo taratibu lakini imekuwa ikiimarika mchezo hadi mchezo.

Mwaka 2014 timu hiyo ilitinga robo fainali nchini Brazil na kuondoshwa na wenyeji. Kiungo James Rodriguez aliibuka mfungaji bora wa michuano hiyo.

Uingereza itamtegemea zaidi kinara wake wa mabao Harry Kane ambaye ameifungia timu hiyo mabao matano akiwa ndiye anayeongoza mbio za kuwania kiatu cha dhahabu.

Kabla ya mchezo huo, saa 11 jioni kutapigwa mchezo kati ya Uswisi dhidi ya Sweden.

Mshindi wa mchezo huo atakutana na mshindi wa mchezo kati ya Colombia na Uingereza kwenye hatua ya robo fainali.

Wengi wanaitabiria Uingereza itafanikiwa kutinga nusu fainali kama itaweza kuiondosha Colombia leo.