Yanayojiri Urusi : Uingereza yatinga robo fainali kwa matuta

Uingereza imefanikiwa kutinga robo fainali ya michuano ya kombe la dunia kwa ushindi wa mikwaju ya penati 4-3 baada ya kulazimishwa sare ya bao 1-1 dhidi ya Colombia.

Uingereza ilitangulia kufunga kwenye mchezo huo katika dakika ya 57 kwa mkwaju wa penati uliopigwa na Harry Kane baada ya yeye mwenyewe kufanyiwa madhambi ndani ya eneo la hatari na Carlos Sanchez.

Hata hivyo wakati mchezo huo ukielekea ukingoni, beki Yerri Mina aliisawazishia timu yake katika dakika ya 93 hilo likiwa ni bao lake la tatu katika mashindano hayo hivyo kuupeleka mchezo huo kwenye dakika 30 za nyongeza na baadae mikwaju ya penati.

Harry Kane, Rashford, Trippier na Dier walifunga mikwaju yao ya penati huku Jordan Henderson akikosa.

Colombia walikosa mikwaju miwili.

Uingereza sasa itachuana na Sweden kwenye mchezo wa robo fainali.

Mapema Sweden ilitinga robo fainali baada ya kuilaza Uswisi kwa bao 1-0.

Mchezo huo umekamilisha hatua ya 16 bora ambapo Uruguay, Ufaransa, Urusi, Ubelgiji, Brazil, Sweden, Uingereza na Croatia zimetinga robo fainali.

Michezo ya robo fainali itapigwa Ijumaa na Jumamosi ambapo siku ya Ijumaa, 06 July, Uruguay itacheza na Ufaransa saa 11 jioni huku mchezo unaofuata ukiwa kati ya Brazil dhidi ya Ubelgiji saa tatu usiku.

Jumamosi, July 07, Uingereza itacheza na Sweden saa 11 jioni wakati Urusi itaikabili Croatia saa tatu usiku.