Manji kurejea Yanga ni swala la muda tu

Wanasema kimya kingi kina mshindo mkuu, hilo ndilo linalokwenda kutokea baada ya Mwenyekiti wa klabu ya Yanga Yusufu Manji kuwa mbioni kurejea kwenye nafasi yake.

Kumekuwa na ukimya tangu kupitishwa kwa Maamuzi ya Wanachama wa Yanga kumtaka Manji arejee kwenye nafasi yake baada ya kuikataa barua yake ya kujiuzulu.

Manji hakutoa kauli yoyote tangu alipoandikiwa barua na uongozi wa Yanga kumtaarifu uamuzi huo wa wanachama uliopitishwa kwenye Mkutano Mkuu Juni 10, 2018.

Jana Mwenyekiti wa Kamati ya Mashindano ya Yanga Hussein Nyika alisema uongozi wa timu hiyo umeendelea kumsubiri Mwenyekiti wao huyo huku wakiamini alikuwa kimya sababu ametingwa lakini atarejea.

Habari njema ni kwamba Manji yuko mbioni kurejea na tayari ameiongezea nguvu za kifedha Kamati ya Tarimba ili kuweza kufanikisha masuala ya usajili.

Yanga ilipewa siku 60 na Serikali kuhakikisha imefanya uchaguzi kujaza nafasi zilizowazi. Uchaguzi huo bado haujaitishwa lakini huenda ukahusisha nafasi mbili za wajumbe wa Kamati ya Utendaji ambao walijiuzulu.

Yanga pia inatarajiwa kuendeleza mchakato wa mabadiliko Manji atakapokuwa amerejea akiwa Mwenyekiti.