Yanga yataja sababu ya Ajib, Tshishimbi kutokuwa kambini Morogoro

Yanga imewasili mkoani Morogoro jana kwa ajili ya kambi ya wiki mbili kujiandaa na msimu mpya wa ligi pamoja na michuano ya kombe la Shirikisho.

Baadhi ya wachezaji hawakusafiri na timu kutokana na sababu mbalimbali.

Mapema leo Afisa Habari wa Yanga Dismas Ten aliwaambia waandishi wa habari kuwa wachezaji wengine wanatarajiwa kuwasili mkoani Morogoro kuanzia kesho.

Ibrahim Ajib, Ramadhani Kabwili na Papi Tashishimbi ni miongoni mwa wachezaji ambao bado hawajatua mkoani Morogoro.

Wakati Ajib akiwa na ruhusa kushughulikia tukio la kuvamiwa biashara yake, Tshishimbi na Kabwili wao walikuwa na masuala ya kiofisi ambayo Ten amesema tayari yamemalizika na watakwenda mkoani Morogoro wakati wowote.

Wakati huo huo Yanga imetangaza rasmi kuachana na mlinda lango Youthe Rostand baada ya yeye mwenyewe kuomba aachwe kutokana na matatizo ya kiafya yanayomkabili.

Afisa Habari wa Yanga Dismas Ten amesema Rostand atalipwa fedha zake zote baada ya mkataba wake kuvunjwa.

Yanga ilikuwa na mpango wa kumtoa Rostand kwa mkopo hata hivyo mwenyewe ameona hayuko sawa kisaikolojia hivyo kuomba aachwe.