Tulijua tutateseka mwishoni - Zahera

Kocha Mkuu wa Yanga Mwinyi Zahera amewapongeza wachezaji wake kwa kufanikiwa kuibuka na ushindi wa bao 1-0 dhidi ya Coastal Union kwenye mchezo wa ligi kuu ya Tanzania Bara uliopigwa Jumatano usiku.

Akizungumzia tatizo la wachezaji kuchoka hasa kwenye kipindi cha pili, Zahera amesema alifahamu hilo litatokea kutokana na wachezaji kutopata mapumziko ya kutosha baada ya mchezo uliopita.

"Tulicheza tarehe 16, tumepumzika siku mbili ya tatu tuko uwanjani. Mazoezi tumefanya siku mbili hivyo tulifahamu kuna wakati kwenye kipindi cha pili tutateseka sana," amesema Zahera baada ya mchezo huo.

"Mpango wetu ilikuwa kucheza kwa kasi kwenye kipindi cha kwanza kuhakikisha tunafunga mabao mengi ili kipindi cha pili tucheze kwa tahadhari"

Hata hivyo Zahera amekosoa matukio yanayofanywa na wachezaji wake na kupelekea wasipate ushindi mnono zaidi.

"Wachezaji wangu wana tatizo moja, wakishafunga wanapoteza umakini.

"Angalia mchezo dhidi ya USM Alger tulikuwa tunashinda 2-0, hivyo hivyo dhidi ya Mtibwa Sugar tulikuwa 2-0 mbele, dhidi ya Stand United tulikuwa tunashinda 4-1.

"Leo tulikuwa na uwezo wa kufunga mabao mengine mawili kupitia mashambulizi ya kushitukiza, lakini wachezaji walifanya uzembe."

Zahera amemwagia sifa kiungo Ibrahim Ajib kuwa sasa ameanza kubadilika kwani amekuwa akijituma uwanjani.