Viongozi wa Matawi Yanga wapinga maamuzi ya BMT

Viongozi wa matawi wa klabu ya Yanga kwa pamoja wamepinga maamuzi ya Baraza la Michezo la Taifa (BMT) ya kuitaka klabu hiyo ifanye uchaguzi wa kujaza nafasi ambazo ziko wazi.

Akizungumza na waandishi wa habari leo, Katibu wa matawi wa klabu hiyo Boaz Ikupilika amesema kwamba viongozi wa matawi katika kikao chao kilichofanyika jana kimeliagiza Baraza la wadhamini kuitisha mkutano mkuu wa dharula ili kupata ukweli wa Mwenyekiti wao Yusuph Manji.

Ikupilika amesema kwamba mbali na hilo pia viongozi hao wamekataa uchaguzi kusimamiwa na TFF kwa sababu kamati yao ya uchaguzi iko hai.

Juzi BMT iliiagiza Yanga kufanya uchaguzi wa kujaza nafasi zilizowazi na uchaguzi huo usimamiwe na TFF ikieleza kamati ya uchaguzi ya yanga haijitoshelezi.

Baraza hilo pia liliagiza wanachama wote wenye kadi tofauti kwenda kwenye matawi yao kujisajili ndani ya wiki tatu kuanzia juzi.

BMT ikaiagiza TFF kuchagua tarehe ya uchaguzi na tarehe yenyewe itangazwe mwezi huu

BMT iliagiza pia kuwa uchaguzi huo uhusishe nafasi ya Mwenyekiti wa klabu ya Yanga baada ya kujiridhisha kuwa Yusufu Manji anayetambuliwa na wanachama kama Mwenyekiti, hajarejea klabuni hapo