Yanga yapania kuiondoa kileleni Azam Fc kesho

Mabingwa wa kihistoria wa Tanzania Yanga kesho wanashuka kwenye uwanja wa Taifa kuikabili JKT Tanzania katika mchezo wa ligi kuu ya Tanzania Bara ukiwa ni mchezo wa kiporo.

Yanga inayoshika nafasi ya pili ikiwa imeshuka dimbani mara 12 na kujikusanyia alama 32, itaweza kukaa kileleni mwa msimamo wa ligi kama itaibuka na ushindi au hata kutoka sare kesho.

Kocha Mkuu wa timu hiyo Mcongomani Mwinyi Zahera amesema timu yake imejiandaa kikamilifu na imejiwekea malengo ya kuondoka na alama zote tatu.

Licha ya kuwakosa baadhi ya wachezaji kutokana na majeruhi na sababu nyinginezo, Zahera amesema hana wasiwasi na kikosi chake kwani kimesheheni wachezaji wenye uwezo.

"Tumejiandaa kikamilifu kuelekea mchezo wa kesho. Kama ilivyo kawaida, tutaingia kwenye mchezo huo tukiwa na malengo ya kuondoka na alama zote tatu," amesema Zahera.

"Baada ya mchezo dhidi ya Kagera Sugar, tumeweza kufanyia kazi mapungufu yaliyojitokeza katika mchezo huo. Tutaingia na lengo letu kuu la ushindi kama tulivyofanya katika michezo mingine"

Ushindi kesho utaipeleka Yanga kileleni mwa msimamo wa ligi lakini pia utaifanya timu hiyo izidi kuitimulia vumbi Simba iliyo nafasi ya tatu na alama 27

Kama Yanga itashinda kesho itaizidi Simba kwa alama nane.

Viingilio vya mchezo huo;

VIP A - 15,000/-
VIP B na C - 10,000/-
Mzunguuko - 5,000/-