Mzuka wa mashabiki unachangia ushindi wa Yanga - Tambwe

Mshambuliaji wa Yanga Amisi Tambwe amesema miongoni mwa mambo yanayowafanya waipiganie timu hiyo mikoani ni idadi kubwa ya mashabiki wanaojitokeza kuwaunga mkono

Tambwe amefichua kuwa wamekuwa wakipata sapoti ya kipekee kutoka kwa mashabiki jambo linalowafanya wajihisi kuwa na deni kubwa kwao

"Hamasa wanayotupa mashabiki inatufanya tujitume zaidi ili tusiwaangushe. Ukiwa uwanjani unacheza na ukaona jukwaani kuwa mashabiki wengi sana wanakuunga mkono, utajiona kama una deni kwao," amesema Tambwe

"Ndio maana tumekuwa tukijitahidi kuhakikisha tunashinda kila mchezo ili kuwafurahisha mashabiki wetu"

Juzi Tambwe aliibeba Yanga kwa kuifungia mabao mawili kwenye ushindi wa mabao 3-1 dhidi ya Tanzania Prisons

Katika mchezo huo Tambwe alingia katika dakika ya 72 na kwa kiasi kikubwa ndiye aliyefanikisha ushindi wa Yanga kwani hata bao la mkwaju wa penati lililofungwa na Ajib mpira uliosababisha madhara ulianzia kwake

Mshambuliaji huyo mwenye umri wa miaka 30 ameahidi kuendeleza rekodi ya kupachika mabao kadiri atakavyopewa nafasi na kocha Mwinyi Zahera