Jana nusura ziibuke vurugu Makao Makuu ya klabu ya Yanga jijini Dar es salaam kufuatia wanachama wa klabu hiyo kumvaa Kaimu Katibu Mkuu wa Yanga Omary Kaaya wakimtuhumu juu ya masuala mbalimbali
Vurugu hizo zilichagizwa zaidi baada ya mwanachama mmoja kumtuhumu Kaaya kuhusika katika usajili wa mlinda lango Ibrahim Hamid aliyesajiliwa mwezi uliopita siku moja kabla ya dirisha dogo la usajili kufungwa.
Mwanachama huyo aliyekuwa na 'jazba' alimtuhumu Kaaya kushirikiana na Mwenyekiti wa Kamati ya usajili Hussein Nyika kukwamisha usajili wa wachezaji wapya kwa maslahi yao huku wakimsajili mlinda lango Hamid bila ya kumshirikisha kocha Mwinyi Zahera.
Zahera alimkana mlinda lango huyo akidai hakuwa akimfahamu na alishangaa ilikuwaje akasajiliwa bila ya idhini yake.
Hamid alionyesha kiwango cha chini kwenye michuano ya kombe la Mapinduzi ambayo Yanga iliyopeleka timu ya vijana, ilitolewa kwenye hatua ya makundi.
Mashabiki wengi wameponda usajili wa mlinda lango huyo aliyesajiliwa akiwa mchezaji huru aliyetokea kucheza soka la ufukweni.
Tangu itangazwe taarifa ya kuahirishwa uchaguzi wa Yanga, mashabiki na wanachama wa klabu hiyo wamekuwa wakifurika Makao Makuu ya Yangawakitaka wapewe taarifa juu ya kinachoendelea klabuni hapo
