Yanga itaingia kambini kesho Jumanne kujiandaa na mchezo wa kombe la FA dhidi ya Biashara United utakaopigwa siku ya Alhamisi, Januari 31 kwenye dimba la Taifa
Vinara hao wa ligi kuu wanapiga hesabu kali kuhakikisha wanatwaa mataji mawili, yaani ligi na kombe la FA (ASFC)
Kocha Mkuu wa Yanga Mwinyi Zahera ameweka wazi kuwa malengo ya timu yake sasa ni kushinda mataji hayo mawili baada ya kutolewa mapema katika michuano ya SportPesa Cup iliyomalizika jana kwa K. Sharks kutawazwa mabingwa
Zahera amesema wachezaji wake wanafahamu malengo hayo na ndio maana wamekuwa wakijituma kuhakikisha wanafikia matarajio ya Wana Jangwani
Baada ya mchezo wa kombe la FA, Yanga itaelekea mkoani Tanga kuikabili Coastal Union katika mchezo wa ligi kuu ya Tanzania Bara utakaopigwa Februari 03
Zahera amesema kwa sasa hesabu zake amezielekeza kombe la FA, baada ya mchezo dhidi ya Biashara Fc watahamisha nguvu zao kuelekea mchezo dhidi ya Coastal Union.
