Yanga imefuta uteja kwa Mbao Fc ndani ya dimba la CCM Kirumba baada ya kuibuka na ushindi wa mabao 2-1 katika mchezo wa ligi kuu ya Tanzania Bara uliopigwa leo
Mbao Fc ilitangulia kufunga bao la kuongoza kwenye dakika ya 45 likiwekwa kambani kwa kichwa na Robert Ndaki
Yanga iliyouanza mchezo huo taratibu ilibadilika katika kipindi cha pili kwa kupeleka mashambulizi ya nguvu langoni kwa Mbao Fc
Heritier Makambo aliirudisha Yanga mchezoni kwenye dakika ya 50 akimalizia kwa kichwa krosi murua iliyochongwa na Papi Tshishimbi
Yanga iliendelea kupeleka mashambulizi langoni kwa Mbao Fc na iliandika bao la pili kwenye dakika ya 68 kupitia mkwaju wa penati uliowekwa kambani na Amissi Tambwe
Penati hiyo ilikuwa ni zao la shambulizi la kushitukiza lililofanywa na Yanga ambapo krosi ya beki Kelvin Yondani aliyekuwa amepanda ilitua mkononi mwa mlinzi wa Mbao Fc ndani ya eneo la hatari na mwamuzi kuamuru upigwe mkwaju wa penati
Ushindi huo umeendelea kuikita Yanga kileleni mwa msimamo wa ligi ikiwa imefikisha alama 61
Makambo amerudi kileleni mwa orodha ya wapachika mabao akifikisha mabao 12 sawa na Salum Aiyee wa Mwadui Fc
Tambwe amefunga bao lake la saba leo
