Washambuliaji Donald Ngoma na Obrey Chirwa kesho wanatarajiwa kuiongoza safu ya ushambuliaji ya Azam Fc mchezo dhidi ya Yanga ambao utapigwa uwanja wa Uhuru
Wachezaji hao walijiunga na Azam Fc msimu huu wakitokea Yanga kwa nyakati tofauti
Ngoma ndiye aliyekuwa wa kwanza kutua Azam Fc mwanzoni mwa msimu akiwa mchezaji huru baada ya Yanga kufikia makubaliano nae ya kuvunja mkataba wake
Majeraha ya muda mrefu yalisababisha Yanga kuamua kuachana na mshambuliaji huyo aliyeipa mafanikio kwenye misimu yake miwili ya kwanza
Hata hivyo Azam Fc ililazimika kusubiri kwa karibu wiki 10 kupata huduma ya mshambuliaji huyo raia wa Zimbabwe.
Azam ilimpeleka Afrika Kusini ili kupata matibabu zaidi
Uvumilivu wao umekuwa na faida kwao kwani Ngoma amerejea kwenye kiwango chake mpaka sasa akiwa ameifungia Azam mabao 10 kwenye ligi
Chirwa alitua Azam wakati wa usajili wa dirisha dogo akitokea nchini Misri ambako alivunja mkataba na timu ya daraja la pili aliyokuwa akiichezea
Aliondoka Yanga mwishoni mwa msimu uliopita baada ya mkataba wake kumalizika
Wawili hao ndio wachezaji wa kuangaliwa zaidi na safu ya ulinzi ya Yanga
Dante hawahofii
Beki Andrew Vicent Chikupe maarufu kama Dante amesema hana hofu ya kuwakabili washambuliaji hao kwani anawafahamu vizuri
"Ngoma na Chirwa tunawafahamu, tumecheza nao kwa muda mrefu hivyo hawatatusumbua," amesema
Chikupe anategemewa kuongoza safu ya ulinzi ya Yanga kesho ambayo itamkosa mkongwe Kelvin Yondani aliyefungiwa michezo mitatu
Beki Abdallah Shaibu 'Ninja' anatarajiwa kucheza sambamba na Chikupe katika safu ya ulinzi ya kati
