Kikao cha Kamati ya dharura cha Kamati ya utendaji ya Shirikisho la Mpira wa Miguu Tanzania (TFF) ambacho kimekutana leo,kimemtangaza Kocha Mkuu wa Azam Ndayiragije Etienne kuwa Kaimu Kocha mkuu wa timu ya taifa ya Tanzania Taifa Stars.
Etienne,amependekeza benchi lake la ufundi kusaidiwa na kocha wa Coastal Union Juma Mgunda pamoja na kocha Msaidizi wa Polisi Tanzania Suleiman Matola,ambapo uteuzi huo umezingatia programu maalumu ya kuendeleza makocha wazawa
Meneja wa Yanga Nadir Haroub ameteuliwa kuwa Meneja wa kikosi cha Stars huku Saleh Ahmed Machupa kutoka visiwani Zanzibar akiteuliwa kuwa kocha wa makipa
Benchi hilo la muda la ufundi litaongoza maandalizi ya kikosi cha Stars cha wachezaji wa ndani ambacho Julai 28 kitachuana na Kenya katika mchezo wa kusaka tiketi ya kufuzu fainali za michuano ya CHAN
