Yanga imeanza kwa kusuasua msimu mpya wa ligi kuu ya Vodacom juzi ikikubali kipigo cha bao 1-0 kutoka kwa Ruvu Shooting
Kipigo hicho kimekoleza mjadala kuhusu uimara wa kikosi cha Yanga hasa safu yake ya ushambuliaji
Licha ya kufuzu raundi ya kwanza ya michuano ya ligi ya mabingwa, wapo wanaoamini kuwa Yanga imepita kwa bahati na matumaini ya kusonga mbele ni madogo kutokana na changamoto ya uhaba wa mabao
Wapo waliokwenda mbali zaidi kwa kusema washambuliaji waliosajiliwa na kocha Mwinyi Zahera hawana uwezo wa kuipa mafanikio Yanga, bora walioondoka
Lakini je, ni kweli kuwa washambuliaji waliosajiliwa hawana uwezo?
Hebu tuangalie, wachezaji wapya wanaounda safu ya ushambuliaji ya Yanga ni pamoja na Sadney Urikhob, Juma Balinya, Maybin Kalengo, David Molinga na Patrick Sibomana
Balinya alikuwa mfungaji bora wa ligi kuu ya Uganda msimu uliopita akifunga mabao 24, hakuna shaka juu ya uwezo wake wa kuzifumania nyavu
Molinga alifunga mabao 11 ligi kuu ya Congo msimu uliopita, alizidiwa mabao matano tu na mfungaji bora wa ligi hiyo
Aidha Sadney ambaye ni mshambuliaji aliyecheza timu nyingi, rekodi zinaonyesha amefunga mabao angalau nane kwa kila timu aliyocheza
Sibomana yeye kwa asili ni winga, kazi yake tayari imejitangaza Yanga
Kalengo ni mshambuliaji anayeendelea kukomaa, huyu anapaswa apewe muda zaidi
Lakini hakuna shaka, Balinya, Molinga na Sadney, kinachowasumbua sasa ni ugeni wao
Naamini wakati utafika washambuliaji hao wataanza kufunga
Tofauti na watani zao Simba, Yanga ni kama imeanza kusuka upya timu yake
Zaidi ya robo tatu ya wachezaji wa kikosi cha kwanza ni wapya
Hapa uvumilivu wa mashabiki unahitajika, hakuna shaka, nyota waliosajiliwa Yanga wengi wana uwezo mkubwa
Japo ni kweli wapo wachezaji ambao hawakufikia matarajio ya wengi akiwemo kiungo mshambuliaji Issa Bigirimana
