Nahodha Msaidizi wa Yanga Juma Abdul ni miongoni mwa wachezaji 32 walioitwa na kocha Etienne Ndayiragije kuunda kikosi cha timu ya Taifa ya Tanzania Bara 'Kilimanjaro Stars' ambayo itashiriki michuano ya CECAFA Senior Challenge itakayofanyika nchini Uganda kuanzia Disemba 07
Abdul amerejea kikosi cha Stars baada ya kupita kipindi kigumu cha majeruhi na kukosa nafasi kikosi cha kwanza
Msimu uliopita haukuwa mzuri sana kwake kutokana na majeraha yaliyopelekea kupoteza nafasi yake kwa kinda Paulo Godfrey 'Boxer' ambaye alipandishwa kikosi cha kwanza na aliyekuwa kocha wa Yanga Mwinyi Zahera
Pamoja na changamoto zote, Abdul hakukata tamaa, alionyesha uvumilivu huku akijituma kuonyesha uwezo kila alipopewa nafasi
Ni uvumilivu wake huo ambao ulimuwezesha kurejea kikosi cha kwanza Yanga baada ya Boxer kuumia pamoja na presha ya mashabiki ambao walimshinikiza Zahera amchezeshe
Katika mechi za karibuni Abdul ameanza kuonyesha makali aliyokuwa nayo misimu miwili iliyopita
Kuitwa kwake Stars ni matokeo ya kazi nzuri anayoifanya dimbani sasa
