Siku sita zimebaki kuelekea mchezo wa kwanza wa watani wa jadi kati ya Simba dhidi ya Yanga ambao utapigwa januari 04 2020 kwenye uwanja wa Taifa
Simba watakuwa wenyeji wa mchezo huo wa kwanza unaozikutanisha timu hizo zenye mashabiki wengi zaidi nchini
Tofauti na msimu uliopita ambao Yanga waliingia wakiwa wanyonge, msimu huu mambo yatakuwa tofauti kwani mabingwa hao wa kihistoria wamejipanga kwelikweli
GSM wanaweza kuwa sababu ya Yanga kutokuwa na hofu kuelekea mchezo huo
Kwani wameleta amani na utulivu Yanga, wamefanya usajili wa nyota wapya na wanashiriki kulipa mishahara ya wachezaji
Aidha kikosi cha Yanga chini ya Kaimu Kocha Mkuu Charles Mkwasa kimeonekana kuimarika
Hawachezi tena mpira wa kujihami kama ilivyokuwa wakati wa Zahera
Kwenye mchezo huo Simba wasitarajie Yanga ya kupaki basi kama ilivyokuwa msimu uliopita
Kwani kwa sasa Yanga haina sababu ya kufanya hivyo, inao wachezaji wanaoweza kusababisha madhara kwa wapinzani wao wakati wowote
'Fitnes' ya wachezaji wa Yanga sasa iko juu, angalia walivyocheza mechi dhidi ya Mbeya City ambayo kama sio 'fitna' za waamuzi, wangeweza kuondoka na ushindi
Mechi dhidi ya Tanzania Prisons pia haikuwa nyepesi, ulikuwa ni mchezo wa matumizi ya nguvu lakini Yanga ilifanikiwa kuondoka na alama zote tatu na kuwa timu ya kwanza kuifunga Prisons msimu huu
Ni hawahawa Prisons waliwapa wakati mgumu Simba kwenye mchezo waliokutana nao uwanja wa Uhuru
Kwa hakika utakuwa mchezo ambao wachezaji wa Yanga watataka kudhihirisha kuwa wanautaka ubingwa msimu huu
