Ajib amtia presha Omog

Kocha Mkuu wa Simba Joseph Omog amekiri mchezo wa watani wa jadi utakaopigwa Jumamosi ijayo utakuwa mgumu kutokana na ubora ulioonyeshwa na kikosi cha Yanga siku za hivi karibuni.

Kocha huyo aliyekalia kuti kavu amekiri kuwa anahitaji kuwaandaa walinzi wake ipasavyo kuweza kumlinda mshambuliaji aliye kwenye kiwango bora sasa, Ibrahim Ajib.

Ajib amekuwa moto wa kuotea mbali ndani ya kikosi cha Yanga ambapo jana ameiongoza timu hiyo kupata ushindi wa mabao 4-0 dhidi ya Stand United, wenyewe akifunga mabao mawili.

Obrey Chirwa ni mchezaji mwingine ambaye anahofiwa na Omog.

“Nimewaangalia Yanga, wana timu nzuri Ajibu na Chirwa ni miongoni mwa wachezaji hatari kwa sasa katika kikosi hicho na katika mechi yetu nitahakikisha hawapati nafasi ya kupewa pasi za hatari ambazo zitakuwa na madhara langoni kwetu,” amenukuliwa Omog na moja ya magazeti ya Michezo.

“Ajibu nilikuwa nae katika kikosi changu msimu uliopita na ana uwezo wa kukaa na mpira akapiga pasi ya mwisho ambayo itakuwa na madhara kwetu, lakini anaweza wa kufunga muda wowote kama atapata nafasi.

“Chirwa ana uwezo wa kukaa na mpira na ana uwezo wa kukimbia huku akiwa na mpira mguuni na anaweza kufunga pia, nimeliona hilo na nitakaa na wachezaji wangu ili kuhakikisha hawapati nafasi kama hizo.”

Yanga na Simba zinakutana kwenye mchezo wa ligi kuu ya Vodacom mzunguuko wa nane Jumamosi ijayo, Oktoba 22 Yanga ikiwa mwenyeji wa mchezo huo.