Tujitokeze kwa wingi uwanja wa Uhuru Jumamosi

Katibu Mkuu wa Yanga Charles Boniface Mkwassa amewataka mashabiki wa Yanga kuhakikisha wanawahi kukata tiketi mapema na kujitokeza kwa wingi kwenye mchezo wa ligi kuu ya Vodacom dhidi ya Simba, Jumamosi Oktoba 28.

AKizungumza na waandishi wa habari leo Makao Makuu ya klabu ya Yanga mtaa wa Jangwani, Mkwassa amesema uwanja wa Uhuru unachukua mashabiki wachache hivyo ni muhimu WanaYanga kununua tiketi kwa wingi ili kuweza kuipa sapoti timu yao katika mchezo huo ambao Yanga itakuwa mwenyeji.

Aidha, Mkwassa amewataka mashabiki kutofanya vurugu dhidi ya wapinzani wao akibainisha changamoto ya usalama kutokana na ukaribu wa majukwaa.

"Kwa ujumla maandalizi yapo vyema na hofu Yangu ni Usalama Wa uwanja kwakuwa ni mdogo,nivyema wanayanga tukawahi kuingia ukizingatia sisi ndiyo wenyeji", amesema.

"Tulijaribu kuomba Taifa lakini imeshindikana na bado hata hawajakabidhi Uwanja kwa serikali. Naamini miaka michache ijayo tutacheza na Simba hapahapa Kaunda"

Naye Afisa wa Habari wa Yanga Dismas Ten amewashukuru wanachama na mashabiki kwa kuendelea kukusanya michango ya kukarabati Uwanja Wa Kaunda.

Akizungumzia kuhusu hali ya kikosi Ten amesema wachezaji wote wako katika hali nzuri ikiwemo wale ambao walikuwa majeruhi.

Benchi la ufundi litaamua kama liwajumuishe kwenye kikosi kitakachoivaa Simba Jumamosi au laa.