Baada ya kushinda mechi nne mfululizo, kocha mkuu wa Yanga Luc Eymael amesema ameridhishwa na mwenendo wa kikosi chake kwani ameanza kuona mabadiliko ya uchezaji aliokuwa akiyahitaji
Hata hivyo amesema timu bado haijafikia katika kiwango anachokitaka
Mbelgiji huyo mwenye historia ya kushinda mataji kwenye kila ligi aliyofanya kazi, amesema lengo lake ni kuwa na kikosi imara kinachoweza kushindania ubingwa msimu huu hata hivyo amesisitiza ni lazima TFF ihakikishe ushindani unakuwa sawa kwa timu zote
"Timu imeanza kuwa na mwelekeo, itabadilika na kufika mahali ninapopataka, ni vigumu wachezaji kubadilika kwa wiki mbili au tatu, lakini tayari kuna mabadiliko yanaonekana kwenye kikosi na wachezaji mmoja mmoja, nafikiri tutafikia malengo, nafasi yetu si mbaya,"alisema
"Nimegundua ushindani uko katika baadhi ya mechi, ni wazi mechi hizo ni chache, lakini ili uwe na timu ya taifa bora, ni lazima uwe na ligi yenye ushindani na imara, nimetazama ligi ya hapa kuna matatizo ambayo yanapaswa yafanyiwe kazi, kuanzia waamuzi na wachezaji, kuna vitu vinahitaji kufanyiwa mabadiliko"
Kesho Jumamosi, Eymael ataiongoza Yanga kwenye mchezo mwingine wa ligi kuu dhidi ya Ruvu Shooting
Ni mchezo wa kisasi kwa Yanga ambayo ilipoteza mchezo wa duru ya kwanza ambao ulikuwa wa ufunguzi wa msimu kwa kufungwa bao 1-0 na maafande hao
