Dalili zimeonekana kuwa Yanga huenda ikamaliza msimu wa tatu bila ya kupata ubingwa wa ligi kuu kutokana na mfululizo wa matokeo yasiyoridhisha
Lakini hili ni jambo ambalo baadhi ya wachambuzi walilitabiri kutokana na mabadiliko yaliyotokea Yanga msimu huu
Timu ilianza na kocha Mwinyi Zahera ambaye pia alifanya usajili wa wachezaji aliowahitaji
Lakini baada ya mechi takribani sita Zahera alitimuliwa akiwa amepoteza mchezo mmoja na sare moja kwenye ligi, matokeo ya kuondoshwa kwenye michuano ya kombe la Shirikisho na Pyramids Fc yakitajwa kuwa sababu
Baada ya Zahera kuondoshwa Mkwasa akakabidhiwa timu ikielezwa angeongoza kwa wiki mbili wakati uongozi ukikamilisha mchakato wa kumpata kocha mpya
Hata hivyo Mkwasa akadumu kwa takribani miezi miwili kabla ya ujio wa kocha Luc Eymael
Wakati wa usajili wa dirisha dogo ni Mkwasa aliyetoa mapendekezo ya wachezaji aliotaka wasajiliwe na wakati huohuo Yanga ikiachana na tabribani wachezaji sita waliokuwa wamesajiliwa na Zahera
Kocha Eymael akakabidhiwa timu iliyoundwa na Mkwasa mwenyewe akipata nafasi ya kumsajili Bernard Morrison pekee
Ukiangalia mfululizo wa mabadiliko hayo kuanzia wachezaji na benchi la ufundi, ni dhahiri changamoto ya muunganiko wa timu ni lazima itokee
Eymael kwa kiasi kikubwa amejitahidi kuimarisha timu licha ya kuwa hana muda mrefu sana
Kwa hali ilivyo sasa ni vyema Eymael akaachwa aendelee kujenga timu bila ya kuwekewa presha na mashabiki
Kwani akiachwa afanye kazi, msimu ujao Yanga itakuwa imara sana. Ameona mapungufu yaliyopo hasa kwenye safu ya ushambuliaji, mwezi Juni atakuwa na kazi rahisi kusajili wachezaji wa kuziba mapengo hayo
Lakini uamuzi wowote wa mabadiliko mengine ya benchi la ufundi kipindi hiki, utaivuruga zaidi Yanga
