Ni wazi msimu wa Yanga kwa upande wa ligi kuu umeshamalizika kwani hakuna tena nafasi ya kutwaa ubingwa kwa mechi zilizobaki
Umekuwa msimu uliokuwa na changamoto nyingi za ndani ya uwanja, kwani nje ya uwanja baada ya GSM kuingia, angalau mambo ya kifedha yamekaa sawa
Wakati mwingine tunapaswa kukubali hali halisi, mara chache mafanikio huja kwa bahati, lakini mara nyingi yanahitaji maandalizi
Mwenyekiti wa Yanga Dk Mshindo Msolla pamoja na timu yake ya uongozi, kwa kiasi kikubwa wamejitahidi kuiweka timu kwenye mazingira ya ushindani
Ujio wa GSM kama wadhamini ni juhudi zao, tumeona mabadiliko ya kikosi tangu wakati wa Zahera mpaka sasa Luc Eymael
Pengine mambo haya yalichelewa kufanyika kwani yamekuja wakati robo ya msimu ikiwa tayari imekatika
Bado kuna nafasi kwenye michuano ya kombe la FA (ASFC) huku ndiko ambako kipaumbele kinapaswa kuwekwa
Kwani ili kupata nafasi ya kushiriki michuano ya Kimataifa msimu ujao, Yanga inapaswa kutwaa taji la FA
Huku kuna mechi tatu muhimu, hizi ndizo mechi za kufa nazo
Yanga imedhihirisha ikiwa na jambo lake ikitaka liwe, linakuwa
Majuzi tu mkazo mkubwa uliwekwa kwenye mchezo dhidi ya Simba na ushindi ukapatikana
Nguvu hiyo sasa ihamishiwe kwenye FA, ingawa bado upinzani utakuwa mkubwa kwani huko nako wale watakaopangwa kucheza na Yanga pengine wataahidiwa mamilioni kama ulivyokuwa mchezo wa KMC!
