Kocha Mkuu wa Yanga, Luc Eymael aliyetarajiwa kurejea nchini juzi, amekwama Ubelgiji kutokana na kasi ya maambukizi ya virusi vya corona.
Kutokana na ukubwa wa janga la ugonjwa huo, safari nyingi za ndege zinazotoka moja kwa moja Ulaya kwenda Afrika zimesitishwa na sasa anafikiria kusafiri hadi Ujerumani katika jiji la Frankfurt kuungaunga ndege hadi Misri kisha Ethiopia.
Eymael aliyekwenda kwao kuoa baada ya Ligi Kuu Tanzania Bara kusimamishwa kwa sababu ya janga la virusi vya corona, akirejea nchini pia anatarajiwa kukaa karantini kwa siku 14
Amesema baada ya kushindwa kuondoka juzi kama alivyopanga, sasa anafanya utaratibu wa kupata tiketi, ingawa anakiri kuwa ni ngumu kurudi nchini kwa ajili ya kuendelea kuifundisha Yanga.
"Hakuna ndege zinazoingia Ubelgiji kutoka Afrika kwa sasa zote zimezuiliwa kutokana na virusi vya corona na suluhisho langu kwa sasa nitasafiri hadi Ujerumani kwenye mji wa Frankfurt nitachukua ndege zinazoenda Misri kisha nitasafiri hadi Ethiopia na kuunganisha tena ndege hadi Dar es Salaam na safari yangu itadumu kwa wiki moja, " Eymael amenukuliwa na Habari Leo
Amesema baada ya kufuata utaratibu wa hapa nchini ambao umepangwa na serikali, kitu cha kwanza atakapoingia Yanga atakutana na viongozi wa timu hiyo na kuangalia wachezaji walioongezewa mikataba na kisha kuangalia mapendekezo ya mahitaji ya nyota wapya anaotaka kuwasajili kuimarisha kikosi hicho msimu ujao kama yamefanyiwa kazi.
Eymael alisema mafaili yote ya mahitaji ya msingi ambayo anahitaji kuboresha kikosi hicho alishawaachia viongozi ili kutimiza makubaliano waliyofanya ili kuhakikisha timu hiyo inakuwa bora zaidi na kutwaa ubingwa msimu ujao.
“Nawaamini viongozi pamoja na mdhamini GSM, yote yataenda sawa na nikifika lazima tufanye kikao cha mrejesho wakati tunasubiri taarifa kutoka kwa Shirikisho la Soka Tanzania (TFF) kuhusu ratiba ya kumalizia michezo iliyosalia ya Ligi,” alisema.
