Waziri wa Afya Mh Ummy Mwalimu amethibitisha visa vipya 53 vya ugonjwa wa corona na hivyo kufanya idadi ya watu walioathirika na ugonjwa huo kufikia watu 147
Katika taarifa aliyotoa kwa Wanahabari mapema leo, Mh Ummy amesema kwamba wagonjwa wote ni raia wa Tanzania.
Amesema kwamba kati ya wagonjwa hao kuna watu 38 kutoka mkoa wa Dar es salaam, Kisiwani Zanzibar watu 10, Kilimajanro mtu 1, Mwanza mtu 1, Pwani Mtu 1 na Kagera mtu 1
"Mnaweza kuona nimetoa takwimu kubwa sana lakini tumeamua tuseme ukweli kwa sababu watanzania sasa lazima waelewe kuwa tunakabiliwa na changamoto kubwa"
"Kama kuna mmoja alikuwa na shauku basi ni wakati afahamu Corona inaanza na wewe kujikinga na pia uwakinge wengine," amesema Waziri
Idadi hiyo ni kubwa zaidi kutangazwa kwa siku moja tangu mgonjwa wa kwanza kugundulika nchini
Waziri Ummy amewataka Watanzania kuendelea kujihadhari na ugonjwa huo ambao umeendelea kuwa changamoto kwa Mataifa yote duniani
