Makamu Mwenyekiti wa Yanga Fredric Mwakalebela amesema kuwa wanaendelea kuwasimamia wachezaji wao kuhakikisha wanafanya mazoezi majumbani kwao ili kuwa tayari wakati wowote pale watakapohitajika
Ligi imesimama kwa zaidi ya mwezi mmoja kutokana na changamoto ya ugonjwa wa corona ambapo Serikali imeendelea kuchukua hatua kudhibiti ugonjwa huo
Serikali ilisitisha shughuli zote za michezo March 17 ambapo wiki iliyopita Waziri Mkuu Mh Kassim Majaliwa alisema katazo hilo litaendelea hadi pale itakavyotangazwa vinginevyo
Mwakalebela amesema Yanga inasubiri mwongozo kutoka kwa Mamlaka husika lakini wanawasisitizia wachezaji wao kuwa wanapaswa kuwa tayari kwani jambo lolote linaweza kutokea
"Tunasubiri mwongozo, lakini ni lazima tuwe tayari kwa lolote, la kwanza ni kwamba msimu haujamalizika, hivyo wachezaji lazima wawe tayari kumalizia mechi zilizobakia, benchi la ufundi linasimamia vema na ninaamini hakuna aliyebweteka," aliongeza
Jana Shirika la Afya duniani (WHO), lilitoa mapendekezo kwa ligi zote kusitishwa hadi mwaka 2021 ambao ni matarajio kuwa janga la corona litakuwa limemalizika
