Mshambuliaji wa Kagera Sugar Yusufu Mhilu anashika nafasi ya pili katika mbio za kuwania kiatu cha dhahabu akiwa amefunga mabao 11 sawa na Reliants Kusajo wa Namungo Fc
Nyota hao wanamfukuzia mshambuliaji wa Simba Meddie Kagere aliyepachika mabao 19 msimu huu
Mhilu ni zao la klabu ya Yanga kwani alilelewa kwenye kikosi cha timu ya vijana kabla ya kupandishwa kikosi cha kwanza na Hans van Pluijm mwaka 2016
Mhilu alikuwa miongoni mwa wachezaji tegemeo wa Yanga wakati wa kocha George Lwandamina lakini alipokuja Mwinyi Zahera pasipo kutarajiwa, alipendekeza mchezaji huyo atolewe kwa mkopo klabu ya Ndanda FC wakati huo akiwa amebakisha mkataba wa mwaka mmoja na Yanga
Baada ya mkopo huo kumalizika Zahera hakuonekana kuvutiwa nae tena na hivyo akaamua kujiunga na Kagera Sugar
Lakini kwa mambo anayofanya Kagera Sugar, ni dhahiri uongozi wa Yanga unaweza kujilaumu kwa kukubali nyota huyo akaondoka kirahisi
Msimu huu Mhilu amekuwa kwenye kiwango bora sana katika klabu ya Kagera Sugar
Matheo Anthony ni nyota mwingine ambaye pengine alipaswa kupewa muda zaidi Yanga
Anthony alijiunga na Polisi Tanzania usajili wa dirisha dogo na kwa muda mfupi ameonekana kuwa mmoja wa washambuliaji tishio ligi kuu ya Vodacom
Hawa ni wachezaji ambao wamekulia kunako klabu ya Yanga lakini pengine uongozi ulifanya papara kuwaruhusu waondoke huku badala yao, wakisajiliwa wachezaji ambao uwezo wao ni wa kawaida
