Mlinzi wa kushoto wa Yanga Jaffar Mohammed anasubiri kusaini mkataba mpya kuendelea kuwatumikia mabingwa hao wa kihistoria
Jaffar ni miongoni mwa wachezaji wanaofanya vizuri kwenye kikosi cha kocha Luc Eymael akiwa amebadilishwa majukumu kutoka kiungo wa ushambuliaji na kuwa beki wa kushoto
Jaffar aliyetua Yanga kutoka klabu ya Majimaji, mkataba wake uliongezwa baada ya aliyekuwa kocha wa Yanga, Mwinyi Zahera kupendekeza baada ya Gadiel Michael kutimkia Simba
Awali alitarajiwa kuwa mbadala wa Muharami Issa 'Marcelo' ambaye hata hivyo alishindwa kutamba kupelekea atolewe kwa mkopo klabu ya Singida United
Mwezi Januari Yanga ilimsajili Adeyum Saleh ambaye naye ameshindwa kujihakikishia nafasi kwenye kikosi cha kwanza akimuacha Jaffar akitamba
Katika mchezo dhidi ya Simba uliopigwa March 08 na Bernard Morrison kupeleka kilio Msimbazi, Jaffar alikuwa miongoni mwa nyota wa Yanga waliofanya vizuri
Jaffar amesema kuwa anasubiri kuongeza mkataba kuendelea kukipiga Jangwani
"Mkataba wangu unamalizika mwishoni mwa msimu, yapo mazungumzo ambayo kama yatakwenda vizuri, nitasaini mkataba mpya," amesema
